Vllaznia - Bylis 3-2

Nr	Skuadra	Pike
1	Teuta	32
2	Tirana	27
3	Skenderbeu	23
4	Kastrioti	23
5	Flamurtari	22
6	Bylis	18
7	Shkumbini	18
8	Vllaznia	17
9	Kamza	14
10	Pogradeci	13
11	Laci	11
12	Tomorri	11
13	Apolonia	8
14	Dinamo	1

Video e Fundit
Facebook

Mire se vini ne fkvllaznia.net

Vllaznia - Bylis 3-2

Vllaznia ‑ Bylis 3‑2

Shënues: Rajoviç 41′, Dimo 51′, Popoviç 57′, Sinani 82′, Jovanoviç 93′

Vllaznia: Vujadinoviç, Smajli, Sykaj, Rajoviç, Belisha, Djepaxhia (Kaçi 71′), Gocaj, Hasani (Jovanoviç 55′), Vajushi, Nimani, Jumiç (Sinani 75′). Trajner: M. Radonjiç.

Bylis: Egbo, P.Arbri, Beka (Besha 81′), Stojku (Bejktoviç 46′), Kepi, Kule, Roshi, Popoviç (Hamzai 59′), Berzovf, Këuj, Dimo. Trajner: I.Spahiu.

Gjyqtarë: K.Meta, R.Avdo, E.Barusha (Tiranë)

Kartona të verdhë: Rajoviç, Vajushi, P.Arbri, Kepi, Kvuj, Kule, Roshi

Minutat

6′- Goditje dënimi për Vllazninë, Smajli kroson në zonë dhe Rajoviç godet me kokë, por mbi traversë.

15′- Jumiç përfiton nga një gabim i Stojkut, del i vetëm përballë Egbo, por gjuajtja e tij është për t’u harruar.

17′- Roshi ekzekuton një goditje dënimi, topi kalon 2‑3 metra larg shtyllës pingule.

23′- Jumiç vepron bukur në zonë, por gjuajtja e tij është për t’u harruar.

35′- Gabon Rajoviç dhe Kvuj përfiton, duke kërkuar Dimon e zbuluar në zonë. Ndërhyn Sykaj, që largon topin, por për pak sa nuk e dërgon në rrjetën e tij.

39′- Djepaxhia ul një top për Nimanin, që gjuan mbi traversë.

41′- Goditje dënimi për Vllazninë nga e majta e sulmit të saj. Kroson Smajli dhe Rajoviç kërcen me kokë mbi të gjithë, duke e dërguar topin në rrjetë, 1‑0 për Vllazninë.

44′- Vajushi vepron bukur nga e djathta, fut një top për Jumiç, që pranë portës nuk e dërgon në rrjetë.

49′- Dimo ekzekuton një goditje dënimi, topi kalon ngjitur me traversën.

51′- Goditje këndi për ballshiotët. Topi shkon në zonë, aty ku Dimo është krejtësisht i lirë dhe e dërgon topin në rrjetë. Bylisi barazon në 1‑1.

57′- Popoviç përfiton nga një gabim i mbrojtjes shkodrane në largimin e topit dhe e dërgon atë në rrjetë, 1‑2 për Bylisin.

78′- Sinani godet me kokë një top të ardhur nga këndi, topi përplaset në traversë.

80′- Sinani pason bukur për Jovanoviç brenda zone, por ky nuk arrin të gjuajë në portë.

82′- Vajushi depërton nga e djathta, kroson dhe Sinani me kokë këtë herë është i saktë, e dërgon atë në rrjetë, Vllaznia barazon në 2‑2.

93′- Sinani nga e djathta pason në zonë te Kaçi, që gjuan me kokë. Topi përplaset në traversë, kthehet në lojë dhe aty Jovanoviç nuk e ka të vështirë ta dërgojë në rrjetë, 3‑2 për Vllazninë.

Vllaznia ka pasur dje si mysafire në stadiumin “Brian Filipi” të qytetit të Lezhës deputuesen Bylis të Ballshit, dhe me shumë vështirësi, madje në kohën limit të shtesës, ka arritur të shënojë golin e fitores, me vlerën e tre pikëve, por dhe me shumë vlera të tjera. Sidoqoftë, për teknikun malazes Radonjiç, kjo fitore ka qenë e merituar, pavarësisht se për hir të së vërtetës, duhet thënë se atë ia dhuruan qytetit futbolldashës të Shkodrës, garda e vjetër e pikërisht Sinani, që jo vetëm shënoi, por dhe ishte protagonist i golit të fitores. Ndërsa ballshiotët e kanë pranuar humbjen, duke e quajtur veten të pafat, duke argumentuar se dëmtimet e dy mbrojtësve kryesorë, Beka e Stojku, dhe dalja e tyre nga fusha e lojës, u dhanë mundësinë shkodranëve të arrijnë këtë fitore, sipas Spahiut, tepër të vështirë. Tekniku shkodran Radonjiç i ka qëndruar fanatik idesë së tij, për të përfshirë në lojë të rinjtë Djepaxhia, Sukaj, Hasani, Gocaj e Vajushi, edhe pse në një moment të caktuar është detyruar t’i zëvendësojë me futbollistë të gardës së vjetër, që pa mëdyshje i zbardhën faqen, duke i dhuruar tre pikë të çmuara. Ndeshja ka filluar si e barabartë, pavarësisht se shkodranët kanë pasur epërsi territoriale, por deri në minutën e 15-të ato pak janë dukur para portës së Egbosë. Skuadra e Radonjiçit i ka “ndezur motorrët” vetëm në 20 minutat e fundit. Mbrojtësi i djathtë shkodran, lezhjani Dritan Smajli, do të bëhej protagonist i shumë fillimeve të manovrës sulmuese shkodrane, por dhe Vajushi, një ndër më të mirët e shkodranëve, do të bëhej problematik për mbrojtjen e ngjeshur ballshiote, duke krijuar situata mjaft të vështira. Loja do të bëhej edhe më e bukur, pikërisht atëherë kur edhe skuadra e Spahiut ka reaguar, duke u larguar disi nga loja në mbrojtje, e duke menduar për golin. 15 minutat e fundit kanë folur me gjuhën e shkodranëve dhe me plot kuptimin e fjalës, ato mund të quhen minutat e rasteve të humbura për shkodranët. Gjithsesi, loja e tyre është shpërblyer në minutën e 40’, kur Rajoviç, i ardhur në sulm, ka shënuar golin e avantazhit për shkodranët, duke i rikthyer atyre qetësinë. Në fraksionin e dytë, Radonjiç luan me të njëjtit futbollistë e ndoshta loja e minutave të fundit, por dhe avantazhi i minutës së 40-të, kanë çuar teknikun të marrë një vendim të tillë. Kurse Spahiu ka zëvendësuar Stojkun e dëmtuar, por skuadra e tij e ka filluar lojën krejt ndryshe nga ajo e pjesës së parë. Futbollistët ballshiotë duken më të freskët në këtë pjesë loje dhe që në fillim, Dimo paralajmëron kur gjuan rreptë e rrezikon seriozisht. Dhe nuk ka vonuar që po ky futbollist të konkretizojë, duke barazuar rezultatin 1-1 dhe gjashtë minuta më vonë, ballshiotët falë lojës së tyre të organizuar e sulmuese kanë gjetur dhe avantazhin. Ka qenë një goditje e rëndë për shkodranët, që ka ndikuar në rënien e lojës së shkodranëve, por nga ana tjetër, kanë detyruar teknikun Radonjiç të lëvizë për të thirrur “heronjtë”. Futja në lojë e Kaçit dhe Sinanit ka ndërruar dukshëm ngjyrat e lojës shkodrane, madje kanë rritur shumë presionin mbi ballshiotët, të cilët, edhe pse në një farë mase simulojnë e vonojnë lojën, kanë dalë duarbosh nga Lezha, pasi shkodranët shënojnë dhe dy herë dhe fitojnë me meritë ndeshjen premierë të tyre në këtë kampionat. Por gjithmonë, falë Sinanit, emrin e të cilit pa e tepruar duhet ta mbajë kjo fitore.

Pas ndeshjes

Radonjiç - Ishte një ndeshje e mrekullueshme. Fituam, humbëm e përsëri fituam. Luajtëm një pjesë të parë shumë të mire, por në pjesën e dytë, bëmë dy gabime, prej të cilave e pësuam. Sinani luajti shumë mirë dhe ne po presim që ai të bëhet dhe më mirë. Ndërsa lidhur me lojtarët e rinj, apo të vjetër, unë them që të gjithë janë lojtarë të Vllaznisë, pa dallim. Sa për të rinjtë, mund të them që ata nuk gabuan, përkundrazi në mbrojtje gabuan futbollistët me eksperiencë. Ne vërtet fituam në minutat e fundit të lojës, por kjo nuk e zbeh aspak fitoren tone, sepse loja kaq minuta ka në dispozicion për të luajtur.

Ilir Spahiu - Mendoj se rezultati nuk i përgjigjet lojës që ne zhvilluam. Më së paku, ne meritonim një pikë. Skuadra ime u dënua edhe nga dëmtimet e dy mbrojtësve kryesorë, Stojku e Beka, dalja nga loja e të cilëve ndikoi shumë në lojën tonë mbrojtëse, në minutat e fundit.

Mendimi i specialistit Ridvan Kulli

Në përgjithësi, ndeshja u dominua nga skuadra e Vllaznisë dhe mendoj se ajo arriti një fitore të merituar. Skuadra shkodrane në pjesën e parë ka zhvilluar një lojë shumë të bukur dhe mund të shënonte edhe gola të tjerë, por nga ana e sulmuesve të saj u humbën shumë raste. Ndërsa pjesën e dytë, mendoj se shkodranët e filluan shumë keq, me dy gabime amatore, prej të cilave pësuan dy gola në një hark kohor shumë të shkurtër. Por përsëri, skuadra shkodrane dhe tekniku Radonjiç gjetën forcën për të përmbysur rezultatin dy herë dhe kjo tregon forcën që ka skuadra shkodrane. Mendoj se edhe zëvendësimet që u kryen ishin me vend dhe të suksesshme. Kjo ndoshta ishte dhe arma me të cilën Radonjiç e fitoi këtë ndeshje. Ndrësa, fjalë shumë të mira duhen thënë edhe për skuadrën deputuese të Bylisit, e cila në këtë ndeshje, ashtu si rrodhën ngjarjet, e meritonte një pikë.

s.ekspres

Postuar me Gusht 23, 2010