Kraja: Te ne luan ai qe eshte ne forme

Kur pritej që të aktivizohej si titullar në ndeshjen e parë të Vllaznisë ndaj Bylisit, Ervis Kraja e ka parë vetën në stolin e rezervave. Në vend të tij, trajneri i kuqebluve Mojash Radonjiç ka aktivizuar të riun premtues, Arsen Sykaj. Por Kraja, si një profesionist i vërtetë, e ka mirëpritur vendimin e trajnerit, duke mos patur aspak paragjykime që ai ka qenë në stol. “Çdo lojtar ka dëshirë që të luajë si titullar. Por vendimet e trajnerit duhen respektuar. Unë jam lojtar profesionist dhe sigurisht që më duhet të respektoj mendimin e trajnerit”. Kështu është shprehur Ervis Kraja, duke treguar diplomacinë e tij, për mosaktivizimin në ndeshjen ndaj Bylisit. Në fakt, ai është aktivizuar në të gjitha ndeshjet miqësore, që ka zhvilluar Vllaznia, nën drejtimin e Radonjiç. Ky fakt siç duket për teknikun malazes nuk ka ndikuar, duke patur si përzgjedhje të parë të rinjtë. “Unë si lojtar kam punuar shumë. Personalisht jam stërvitur, kur skuadra ka qenë pa trajner. Po ashtu dhe gjatë kohës në fazën përgatitore, jam munduar të bëj maksimumin. Detyra ime është të stërvitem dhe të kem një formë të mirë. Trajneri është ai që vendos dhe sigurisht që unë do të jem i gatshëm, sa herë që të jetë e nevojshme”, ka thënë Kraja. Ndërkohë, duke u ndalur tek ndeshja e Bylisit, sidomos për gabimet e realizuara nga reparti i mbrojtjes, Kraja nuk preferon të bëjë një koment të detajuar. Ndërsa ndalet, duke menduar pozitivisht për ndeshjet e ardhshme. “Po në futboll do të ketë gjithmonë gabime. Rëndësi ka që skuadra të reagojë dhe të korrigjohen gabimet e bëra. Unë mendoj për ndeshjet e ardhshme. Gjendja e skuadrës për mua është shumë e mirë. Ndërkohë që më rikthimin e Sinanit, Vllaznia bëhet më e frikshme. Kam thënë disa kohë më parë se, me rikthimin e tij, dhe ekipi do të dijë të shënojë dhe të bëjë më pak gabime. Për mua si futbollist e rëndësishme është që skuadra të fitojë dhe të arrijë rezultatet”, shton ai.

Të rinjtë- “Unë për vetë si futbollist, dua të aktivizohet ai lojtar që e meriton”, shprehet i bindur qendërmbrojtësi shkodran, për elementin e ri dhe atë më eksperiencë, që përbëjnë skuadrën shkodrane. Duke mohuar të gjitha zërat që qarkullojnë në qytetin e Shkodrës se, lojtarët më eksperiencë i kanë zili të rinjtë, Kraja është një mbështetës për talentet e rinj. “Unë dua të them se asnjë futbollist nuk e ka zili një lojtar të ri, aq më tepër te Vllaznia. Ne jemi mësuar në këtë skuadër, sepse ka nxjerrë gjithmonë talente. Edhe unë kam qenë

i ri dhe jam aktivizuar. Unë mbështes fjalën e trajnerit se, duhet të aktivizohet ai lojtar që e meriton. Për vete nuk i trembem konkurencës, sepse ajo forcon skuadrën dhe rrit nivelin e lojës. Rëndësi ka që unë të jem i gatshëm për ekipin”, shton ndër të tjera futbollisti shkodran.

s.ekspres

 Postuar me Gusht 27, 2010