Kuqeblutë, në Krujë me ndryshime në formacion

Trajneri malazez i Vllaznisë, Mojash Radonjiç, pritet të luajë ndryshe nga java e parë

Ndeshja e radhës kundër Kastriotit konsiderohet shumë e rëndësishme në kampin shkodran. Njëkohësisht edhe shumë e vështirë, sepse luajnë ndaj një skuadre e cila në fushën e vet gjithnjë u ka nxjerrë probleme. Duke qenë kështu, stafi drejtues i Vllaznisë ka menduar që për këtë ndeshje të bëjë disa ndryshime në formacion. Trajneri Radonjiç do t’u besojë për këtë takim disa lojtarëve më me përvojë, megjithatë sërish ndryshimet nuk do të jenë të mëdha. Në ndeshjen e kontrollit të së mërkurës, kuqeblutë janë ndarë në dy ekipe.

Ajo çka vërejmë në formacionin e parë, ka qenë aktivizimi i shtatlartit Ervis Kraja. Ai së bashku me Rajoviçin kanë formuar dyshen e qendrës, ndërkohë që Smajli e Belisha do të jenë në krahë edhe ndaj krutanëve. Aktivizimi i Krajës në mbrojtje ka pasur si qëllim rritjen e forcës së skuadrës në prapavijë, sidomos në lojën në ajër, çka konsiderohet një nga pikat më të forta të kundërshtarit të radhës.

Ndaj Bylisit, në javën e parë të kampionatit, në këtë vend pati luajtur mjaft mirë Arsen Sykaj. Ky futbollist, pavarësisht se Kraja pritet t’i zërë vendin në mbrojtje, nuk do të kalojë në stol. Lojtari i ekipit kombëtar Shpresa luan mjaft mirë në disa pozicione dhe prandaj Radonjiç pritet ta kalojë në mesfushë në rolin e shkatërruesit. Në këtë pozicion ai ka luajtur thuajse në të gjitha miqësoret e pragsezonit.

Bashkë me të mund të luajë në qendër të këtij reparti edhe Gocaj, që është spostuar pak më përpara, me detyra më organizuese. Në krahun e djathtë të mesfushës do të luajë sërish Vajushi, i cili ndaj Bylisit bëri një paraqitje të mirë, sidomos në pjesën e dytë. Në të majtin ndërkohë mund të ketë ndonjë ndryshim. Kjo është parë në testin e kontrollit të së mërkurës, kur në pjesën e parë ka luajtur Djepaxhia, ndërsa në të dytën ka hyrë Kaçi.

Me shumë mundësi në Krujë do të luajë ky i fundit, sepse edhe në ndeshjen e parë të kampionatit tregoi një formë shumë të mirë sportive në ato minuta që luajti. Ndryshim do të ketë edhe në sulm, teksa Hasani këtë herë pritet të kalojë në stol, ndërkohë që në vend të tij luajti në ndeshjen e kontrollit Nimani. Ky i fundit e bën mjaft mirë detyrën e sulmuesit të dytë dhe për këtë arsye, meqë luhet në transfertë, nuk përjashtohet mundësia që të luajë ai përkrah Jumiçit.

Në fakt, pasditen e së mërkurës është provuar në pjesën e dytë edhe Sinani në fushë, por me shumë mundësi sulmuesi i njohur do të shërbejë sërish si “asi nën mëngë” për stafin drejtues për pjesën e dytë. Këto janë pak a shumë ndryshimet e pritshme për ndeshjen e kësaj jave me Kastriotin.

s.shqiptar

 Postuar me Gusht 27, 2010