Radonjiç: Në Krujë s’ishte Vllaznia e vërtetë

Trajneri malazez Mojash Radoniç ka mbetur i pakënaqur nga loja e të tijve ndaj Kastriotit

Ka mbetur tepër i pakënaqur nga loja e zhvilluar prej skuadrës së tij në ndeshjen e së shtunës me Kastriotin. Mojash Radonjiç, megjithatë, “mbahet”. Nuk kërkon ta lëshojë veten dhe, për rrjedhojë, edhe fjalët i ka të matura. Nga goja i del edhe ndonjë fjalë jo e mirë, megjithatë asnjëherë nuk fajëson individë të përveçëm apo të akuzojë ndokënd.

Malazezi është i matur. Di t’i analizojë gjërat me qetësi dhe analiza e parë që ka bërë pas barazimit me Kastriotin, e ka nxjerrë në përfundimin se kjo ishte ndeshja më e dobët e Vllaznisë që kur ai është trajner i saj. “Kemi zhvilluar një ndeshje të dobët, më të dobëtën, duke marrë së bashku ndeshjet zyrtare dhe ato miqësore që kemi zhvilluar në prag të sezonit. Skuadra nuk ka funksionuar dhe prandaj nuk bëmë asgjë të mirë në atë ndeshje.

Duhet të kënaqemi me pikën që kemi marrë.” E ka thënë hapur dhe jo vetëm ai. Me lojën e Vllaznisë në Krujë të gjithë ata që kanë qenë të pranishëm në stadium, por edhe ata që e kanë ndjekur nga ekrani i televizionit. Duke dashur të thotë shpejt e shpejt edhe arsyet pse skuadra e tij luajti në këtë mënyrë, Radonjiç shprehet: “E goditëm pak herë portën kundërshtare dhe këtë e bëmë në fundin e ndeshjes. Nuk është normale kjo gjë, por nëse nuk kemi shkuar në sulm aq sa duhet, faji ka qenë i repartit të mbrojtjes.

Ai ka dhuruar gjithnjë pasiguri dhe prandaj kemi luajtur prapa për të mos pësuar. Për fat, ndodhi kështu dhe ne e morëm një pikë.” Me këtë barazim, shkodranët janë ngjitur në kuotën e katër pikëve. Në pamje të parë, jo keq, por mundësitë kanë qenë për të marrë edhe gjashtë. E pranon edhe vetë trajneri i Vllaznisë, kur thotë:

“Në pamje të parë, 4 pikë nuk janë pak për dy ndeshjet që kemi zhvilluar dhe dëshira do të kishte qenë për të pasur 6, por të mos harrojmë se nga dy ndeshjet e luajtura, asnjërën nuk e kemi zhvilluar në fushën tonë. Në këtë kontekst, duhet të jemi deri diku të kënaqur, aq më tepër nisur edhe nga fakti se në këto ndeshje kemi pasur jo pak ndryshime në përbërje edhe në lojën tonë.

” Në skuadër ka ende shumë punë për të bërë dhe për këtë arsye ndërprerja e kampionatit duket se ka ardhur në momentin e duhur për Vllazninë. E pranon edhe vetë trajneri Radonjiç, që në fund të prononcimit të tij do të shprehej: “Mendoj se kjo ndërprerje dyjavore do të na shërbejë jo pak për skuadrën. Kemi disa lojtarë që e kanë filluar vonë stërvitjen, ose i janë bashkuar vonë ekipit.

Për këtë arsye, do të jetë një periudhë pune, në mënyrë që Sinani, Jovanoviç, Jumiç apo edhe Semina të vijnë në formën e tyre më të mirë dhe t’i shërbejnë skuadrës. Pas këtyre 15 ditëve, mendoj se Vllaznia do jetë më në formë dhe më e gatshme për ta përballuar ashtu siç duhet kampionatin.”

s.shqiptar

 Postuar me Gusht 30, 2010