Vllaznia është duke u përgatitur që të realizojë një blerje shumë cilësore. Bëhet fjalë për mesfushorin malazez me tipare sulmuese, Nenad Brnoviç, një futbollist që ka luajtur më parë edhe për përfaqësuesen e ish-Jugosllavisë (6 ndeshje), si dhe për atë Serbi & Mal i Zi (9 ndeshje, të fundit kundër përfaqësueses italiane). Drejtuesit shkodranë kanë biseduar me lojtarin në fjalë dhe i kanë propozuar atij një kontratë deri në fund të këtij sezoni, me të drejtë rinovimi edhe për një vit tjetër. Vllaznia i ka bërë ofertën konkrete lojtarit dhe brenda këtyre ditëve pritet që ai t’i bashkohet skuadrës, në “shtëpinë e tij”, në Mal të Zi në fazën përgatitore dhe të firmosë.

Brnoviç, 31 vjeç më 18 janar, luan si mesfushor i përparuar. Është 1. 77 cm i gjatë dhe ka një karrierë të pasur futbollistike. Këtë sezon ai ka luajtur në kampionatin iranian për vetëm fazën e parë me skuadrën e Mes Sarcheshmeh. Në karrierën e tij bie në sy aktivizimi në skuadra si Zeta, Partizani në Kroaci dhe Buduçnost në kampionatin malazez. Ai ka arritur që në karrierën e tij futbollistike si mesfushor të shënojë 27 gola në afro 300 ndeshje zyrtare. Shifrat do të kishin qenë edhe më të larta, porf karriera e tij ka patur një ndërprerje të gjatë – mars 2006 deri korrik 2008 – si pasojë e një thyerje të këmbës së djathtë.

Sipas drejtuesve të skuadrës shkodrane, arritja e marrëveshjes me një futbollist të tillë do të ishte një avantazh i madh për skuadrën dhe një përforcim cilësor në repartin e mesfushës.

Sport Ekspres

Qendërmbrojtësi brazilian mund të firmosë që sot, ndërsa priten 3 brazilianë të tjerë, që do të testohen në fazën përgatitore në Ulqin

Mbrojtësi brazilian Denis Viana Da Silva mund të konsiderohet zyrtarisht blerja e parë e Vllaznisë në këtë merkato janari. Ai është një nga lojtarët e preferuar nga ana e trajnerit Vata dhe për rrjedhojë drejtuesit e klubit e kanë bërë realitet blerjen e tij. Në fakt, nuk ka qenë e lehtë marrja e tij, sepse më parë është dashur të arrihet akordi me presidentin e Bylisit, Besnik Kapllanaj, që zotëron kartonin e këtij futbollisti.

Kjo gjë tashmë duket se është arritur dhe mbrojtësi brazilian mbërrin sot në Shkodër. Drejtuesit e klubit shkodran kanë mbyllur çdo gjë sa i takon kontratës së tij dhe po ashtu merret vesh se i kanë prerë edhe biletën e avionit. 25-vjeçari në këtë mënyrë mund të quhet plotësisht futbollist i Vllaznisë, sepse do udhëtojë me të drejt Ulqinit për fazën përgatitore bashkë me ekipin. Për të tjerët ende nuk ka një objektiv të qartë se çfarë do bëhet. Dimo kthen përgjigje ditën e shtunë nëse do vijë apo jo.

E po ashtu edhe tre futbollistët e Tiranës, Bala, Lika e Dushku janë para faktit se çfarë do bëjnë, do qëndrojë te bardheblutë apo do kërkojnë një skuadër tjetër. Megjithatë, Denis Viana Da Silva nga dita e sotme mund të quhet zyrtarisht pjesë e Vllaznisë, sepse nga Bylisi tashmë nuk ka më asnjë pengesë.

Drejtuesit e saj kanë rënë dakord me presidentin Kapllanaj dhe lojtari pritet të firmosë për 2.5 vjet me skuadrën shkodrane. Nëse gjatë kësaj periudhe ai do shitet në një skuadër tjetër, atëherë klubi Vllaznia do të përfitojë 50 për qind të vlerës së kartonit dhe po kaq edhe Bylisi. Ky është akordi i arritur mes palëve dhe ata duken të kënaqura. Da Silva është kërkuar me ngulm nga ana e trajnerit Vata, që e konsideron qendërmbrojtësin më të mirë të kampionatit shqiptar.

Përballë një bindjeje të tillë, të krijohet përshtypja se kemi të bëjmë me një lojtar shumë të rëndësishëm për të ardhmen e kuqebluve dhe për këtë arsye, ata mendojnë të firmosin për 2 vjet e gjysëm me të. Çdo gjë duket gati vetëm për firmë dhe ajo ndoshta do hidhet që sot, në mënyrë që lojtari të jetë i qetë përpara nisjes së stërvitjes me skuadrën e tij të re. Por përveç Da Silvës, po sot mbërrijnë në Shkodër edhe tre futbollistë të tjerë brazilianë.

Nga të dhënat paraprake, mësohet se ata kanë një moshë 20-24 vjeç dhe luajnë nga një në secilin repart të fushës. Dje të tre këta futbollistë kanë mbërritur në Turqi dhe sot në mesditë do jenë në Rinas për të marrë menjëherë pastaj rrugën për në Shkodër.

Këta futbollistë do jenë në provë për disa ditë me kuqeblutë, megjithëse menaxherët që i kanë sjellë janë të mendimit se niveli i tyre është i lartë dhe prova do kalojë me sukses dhe ata do mbeten te Vllaznia. E rëndësishme është që brazilianët kthehen në Shkodër. Da Silva një herë është e sigurt që do qëndrojë. Për të tjerët mbetet për t’u parë.

Sporti Shqiptar

Pas 3 mbledhjesh radhazi, më në fund dje drejtuesit e Bashkisë Shkodër kanë arritur të kalojnë në Këshillin Bashkiak miratimin e kalimit të fushës sportive “Reshit Rusi” si aset i shoqërisë aksionare Vllaznia. Bashkë me të, në mbledhjen e djeshme është miratuar edhe vlera e stemës së klubit “Vllaznia” dhe të gjitha këto së bashku e kanë çuar tashmë vlerën e këtij klubi në 2.8 milionë dollarë.

Çka do të thotë se gradualisht drejtuesit e Bashkisë Shkodër po bëjnë gati të gjithë dokumentacionin që duhet për ta nxjerrë në shitje klubin e futbollit që sot për sot, menaxhohet plotësisht nga ky institucion, i cili zotëron edhe 100 për qind të aksioneve të saj. Kështu, nëse në dy mbledhjet e mëparshme nuk u arrit miratimin e kalimit të fushës sportive “Reshit Rusi” në varësi të KF “Vllaznia” sh.a., dje kjo gjë është realizuar pa as më të voglin problem, teksa të gjithë anëtarët e Këshillit Bashkiak e kanë miratuar këtë gjë.

Vlera e truallit ku është e ndërtuar kjo fushë është llogaritur me shumë kujdes, në bazë të çmimeve që Bashkia Shkodër ka vendosur për zonat e ndryshme të qytetit dhe bashkë me to, është llogaritur edhe investimi që është bërë vitin e kaluar dhe të gjitha këto së bashku kanë kapur një vlerë te 2 milionë dollarët.

Por në mbledhjen e djeshme, krerët e bashkisë kanë kaluar si aset të shoqërisë aksionare Vllaznia edhe stemën e klubit, e cila sipas ligjit në fuqi, kap vlerën e 30 përqindëve të vlerës aktuale. Që do të thotë se stema e Vllaznisë kushton 63 milionë lekë të reja. Duke i shtuar gjithë këtyre shifrave edhe 18 milionë lekët që Bashkia Shkodër ka hedhur si aksione deri tani, e gjithë shuma ka arritur në 2.8 milionë dollarë.

Kuptohet që në ditët në vazhdim do ketë edhe përllogaritje të tjera, si vlera e futbollistëve aktualë, historia e trofetë, ndërkohë që stadium “Loro Boriçi” nuk do kalojë në varësi të klubit të futbollit, por do të mbetet pronë e Bashkisë Shkodër.

Stadiumi Ndoshta interesi i investitorëve që mund të kenë interes për të blerë Vllazninë do ishte më i madh nëse edhe stadiumi do ishte pjesë e këtij klubi me histori 92-vjeçare, por drejtuesit e bashkisë nuk mendojnë kështu, sepse stadiumi do mbetet gjithmonë në pronësi të saj. Ende nuk është shumë e qartë nëse edhe toka ku mendohet të ndërtohet kompleksi sportiv do kalojë apo jo në varësi të klubit të futbollit, por me shumë siguri, kjo do ndodhë sa të plotësohet i gjithë dokumentacioni përkatës për pronësinë e saj.

Nëse do ndodhte edhe kjo, sigurisht që vlera e klubit “Vllaznia” do të rritej shumë. Bashkia Shkodër ka ndër mend kësisoj që nga janari të nxjerrë në shitje aksionet e kësaj sh.a.-je, por për momentin asnjë biznesmen nuk ka dalë publikisht të thotë se ka interes për të blerë një kuotë të caktuar aksionesh.

Në mbledhjen e djeshme të Këshillit Bashkiak Shkodër nuk është marrë në shqyrtim kërkesa e gjashtë ish-donatorëve të këtij klubi, zotërinjve Valter Fushaj, Agron Çela, Xhevdet Amuli, Elvis Myftar Çela, Pjerin Fushaj dhe Flamur Hoxha për njohjen e kontributeve të tyre financiare në vite për këtë klub si aksione të tyre në vlerësimin që po i bëhet klubit nga drejtuesit e bashkisë. Një kërkesë e tillë pritet të merret në shqyrtim në mbledhjen e ardhshme. Megjithatë, Vllaznia deri tani e ka rritur vlerën e saj në 2.8 milionë dollarë.